賀5個月紀念!!!

好在今日joejoe唔使加班, 我同joejoe又可去長州玩啦!! 好在今日唔係太多人入去長州, 實在太好了!! 可以係長州寧靜地享受我哋相愛五個月紀念^^




黎左長州幾次, 都唔記得影最代表長州既野 -漁村及船, 呢次影下先~呢隻係中型船~




五隻船排埋一齊!! 覺得有d壯觀呢!!




比較先進及大少少既漁船呢~又要出發去補魚嗎???




有漁船返長州囉~唔知係咪有好既魚獲呢??? 船仔細細行得算快啦!!




終於見到粉白色果座街市啦!! 快d到碼頭啦, 好心急去玩!!




唔好太心急啦~終於到左長州, 仲見到泊係碼頭既漁船~




我同joejoe去到長州都肚餓啦, 不如先去休息下及食野先! 呢個係我叫既牛腩麵, 牛腩及湯底超正, 不過麵就太多簡水...




joejoe叫既叉燒麵~睇落去叉燒半肥瘦, 都幾正咁喎~

同joejoe食完野之後就周圍行下, 可能係臨近太平青照, 有好多同搶包山有關既野買, 我先知道搶包山原來叫[bun festival]...XD




咁多間店舖, 講創意應該係呢間~係一個六小福既平安包店舖, 而且毎隻可跟據佢地既眼睛有唔同既名, 我應該係最like 果隻錢錢吧, 兩隻眼都係錢, good!!




全間店舖都係賣六小福既物品~其中個磁石標把最可愛, 不過驚姪仔亂拎黎玩及慳錢, 都係冇買到><




仲有呢個平安包情侶電話繩~係唔同色既一對熊仔, 各自拎住平安包, 都幾可愛架!!




心血來潮買左兩件平安包, 呢兩個唔係公仔, 真係食得架!! 諗自比屋企人試下~不過而家先同joejoe影左相先啦!!




呢份就係我哋五個月既紀念禮物啦!! 岩岩好一男一女, 好襯呢!!




我哋既生日禮物就係呢對公仔, 除左頂帽既顏色唔同外, 女仔果隻頂帽仲多左兩隻耳仔. 呢對公仔唔止擺得, 仲用得, 頂帽可以用電腦時擺手, 白色個包可以做電話座及抺mon~




呢隻係我既平安女~頂帽果兩隻耳好似兔仔, 而且也係我like既粉紅色^^




joejoe既平安仔呢~好似佢一樣咁活潑咁!? 岩岩好湊埋一對><




行完街街, 買完野之後, 由於我哋好晏先食個牛腩麵, 所以只食dessert就算, 咁當然又係去返呢間, 已經係第三次呢!! 呢個係我叫既什果椰汁西米露~




joejoe叫既什果芒果布甸, 睇黎joejoe真係好like食布甸咁, 等我整多d比佢食先~

終於有工做啦....XD

今日既行程比較忙, 等我大致講比大家聽下先:

11:00 : 到葵涌見工
12:30 : 回自己公司幫父母拎野返屋企
1:30 : 回屋企 + 食lunch
2:00: 附近搭巴士去荃灣地鐵站, 之後去TST見工
2:50: 到達第二間見工既公司, 係TST
4:50: 等公司內部決定及2ND IN, 比第二間公司取錄了, 下星期一正式返工!!
5:00: 約左好友文迪
7:30: 約joejoe一齊食飯~

見講左葵涌見工先, 呢次去既公司, 其實上年我冇野做時都去過, 係一間叫做NNR global logistics既公司, 係日本人開既, 全間公司有二百人到. 估唔到又係呢間, 最慘既係要迫毎位員工放兩日冇薪假, 真係幾慘!!




NNR 公司既大廈, 雖然門口唔係太大, 但間公司就大啦!!




我爸爸公司附近既大廈, 叫做偉倫中心, 一共有兩座, 我見既係第二座~




呢間公司佔了全層, 一出lift就見到呢間公司既牌, 果然係間大公司黎><




間公司既門口~一望入去就係接待處呢!! 全間公司以藍白為主, 感覺整齊

入去要用接待處既電話打比會計及行政部門要求見工, 等左好耐先有人比表我填及有人見工, 見左都有一個鐘, 唔係因為我有能力. 而係等人等左咁耐, 之後就返爸公司度拎野

都有好多野拎, 都幾鬼重呢!! 之後買埋我既lunch, 返到屋企食飯. 點知原來已經點半, 要快d食飯先得!! 只有十五分鐘><""

食完飯之後再搭車到尖沙咀, 先搭巴士到荃灣地鐵站, 之後再搭地鐵. 好在都冇遲到, 仲早左十分鐘到, 真係開心~之後係公司內做test, 突然joejoe打電話黎, 佢誤會我見完工, 我仲好大聲鬧佢, 真係對唔住呢, 可能我係公司太緊張, 驚比其他人知道我講電話, 而且又唔記得較震機, 真係嚇得我...

做完二十分鐘既test之後去見部門女主管, 同佢既對答都..ok啦, 不過不失, 都係考腦筋急轉彎, 最記得有個問題: [如果主管發脾氣鬧我, 我會覺得點??], 起初真係難起我呢, 因為始終係女人, 係最小氣既生物, 咁當然包括我, 如果答錯會影響就職機會, 所以我最後答左:

[毎個人都有情緒, 尤其係忙碌既時候, 語氣一定會重左d, 所以大聲呼喝係在所難免]

估唔到我識咁答, 其實都係諗咩講咩. 最後都係問我一些工作上既問題, 如怕唔怕蝕底, 願唔願意做更多低下既工作, 咁我又覺得冇所謂既. in完之後主管和第一次見工既兩名經理商討, 最後決定請左我, 仲問我幾時可以返得工, 我話下星期一, 之後佢幫我影印學歷及工作證明文件, 成功啦!!

咁好既消息, 但我只係話比joejoe, 文迪及菜菜, 同埋我媽及姑姐知道, 之後再係fb度話比各朋友知, 多謝佢地係我冇工作既難關支持我及鄧我開心, 希望我可做好呢份工, 話哂第一次係大公司做, 真係有d緊張, 而且福利仲超好:

1) 十三個月糧
2) bonus, 正確黎講毎年都有十三個月 + bonus, 打工仔最想有既野有哂><
3) 牙醫及醫療津貼
4) 只係返五日工!!! 我果然太好彩~~星期六日可以見朋友及私影^^

估唔到都要in成差唔多兩個鐘, 要文迪久等啦><..... 我哋先周圍行行, 之後同文迪去食dessert. 我哋好耐冇見, 也有太多野講, 也知道文迪有個終極決定, 都嚇左我跳, 都係等佢本人講好d




就係呢間店舖, 簡格都幾四正, 全間店舖以啡白色為主, 氣氛唔錯呢~




太耐冇見過文迪呢~依然都係咁靚女!! 仲向佢請教了斯文衫之道, 真係要慢慢學呢~




就係呢個咖啡椰子綿花冰, 仲有難食既涼粉, 原來我同文迪都唔like食, 但都唔好哂啦, 毎人食d!!




由於落雨既關係, 同文迪周圍行商店, 見到呢兩款家私擺設好可愛啊~




仲有兩張杯型既椅子呢~如果大果張係joejoe, 細果張係我既, 一齊坐住黎睇電視就好呢~




呢張椅子內既公仔, 用唔同既布料做出黎, 好可愛呢~同張椅子好襯^^




呢張係細杯椅子, 仲有好可愛既桔子, 桔子也係用唔同布料整, 可以攬住佢就好呢!!

同文迪行完街一陣, 佢男友就打電話搵佢, 仲約左同佢男友集合, 我竟然冇拎遮, 好在文迪借把遮比我, 我返工同你距離咁近, 加上之後會同你網上買野, 可以還比你啦!! 而我都去地鐵站搵joejoe, 同佢一齊慶祝我有野做先!!

終於到我哋二人世界啦, 全個星期冇見, 好掛住大家呢!! 之後同佢去一間日本餐廳食壽司, 所有壽司只係半價!? 咁抵, 一於入去食先~




自己個位既快子及碟, 感覺都幾靚及幾高級喎! 唔知食物好唔好食呢?




幾多人黎食野架!! 而且多數仲係情侶~牆上也有賣壽司, 手卷及軍艦半價, 感覺上可大飲大食啦~




冇化妝 + 著到OL樣既我~都有點唔習慣呢!! 係度等食中, 好肚~~餓~~啊!!




同樣愛食三文魚既joejoe及我一於叫左三文魚壽司先~半價五元兩件, 係最抵及最好食既一樣~




呢個係油甘魚壽司, 也係我至愛之一, 但比較酸味, 唔新鮮, 唔好味既><




係長腳蟹壽司黎架, 隻碟太燈太難影.....味道就麻麻地啦, 只係我哋未食過, 心思思想食下~




終於可以食到櫻花尤魚~呢個都唔錯, 尤魚好爽口, 好鬼死好味!!




仲有呢個阿拉斯加蟹肉壽司~都幾好味既, 不過自己都係like魚多d..XD




仲叫多左個芝士焗什菌, 有金菇, 雞比菇, 小磨菇, 都幾好味, 其中以金菇最入味!!

食完飯之後同joejoe到尖沙咀海旁行下~見到有好多情侶都行呢!! 我哋邊行邊傾計, 最後回紅磡各自搭車回家, 見到附近既一間酒店內餐廳都好靚啊, 好似叫做海景酒店!!




其中一間叫[夢上海]既中餐廳, 裝修真係靚絕. 仲有接待處~感覺好豪華呢!!




裝修好靚既中餐廳吧!? 咁就唔知啦, 都係見佢廣告牌話有火窩任食, 應該係吧?




仲有間酒坊, 有好多酒賣, 同時也知道joejoe都飲得酒架, 勁啊!!




咁靚既酒店餐廳, 如果可以同joejoe係度食自助餐就好啦, 望住出面既景色食飯, 加上咁靚既格局, 好浪漫呢!!

網上商店

琴日我係fotop, 見到有個dc fever內既女model開左間網上商店, 賣既衫雖然唔太多, 但有兩件我睇中左呢, 即使冇收入都要買, 因為真係太平太抵呢!!




我買左呢條白色碎花既連身裙, 我起初以為裙黎架, 點知細睇原來係褲, 都幾得意喎~又係買碎花呢=.="




另外就係呢件灰色~放心啦, 我唔會著到好似相中個女仔太sexy既. 入面可配吊帶底衫及裙等, 又或者出面襯件衫又得~

後來仲發現網上商店既物品可以平成咁, 而且仲係今年興既夏天款, 碎花連身,半載裙及最潮既連身長褲都有, 比出面起碼平幾十元, 又吸引我呢位人兄買衫啦, 不過我連工都未搵到, 邊度得黎搵錢買衫?? 之後既私影靠哂份工及網上商店啦><

講開工作, 今日去幫爸交卡數期間收到兩個叫我in既電話, 點解屋企唔響, 要係街度先響架!? 第一份係早上11:30去葵涌見既. 呢份工上年我冇野做見過, 估唔到今年又見返, 都唔知好嬲定好笑, 仲要迫員工放兩日冇薪假!! 另一個interview係三點, 就係呢個星期一岩岩去完既尖沙咀the gateway果間, 就係呢間美國大公司啦, 呢次係2nd in, 真開心呢!! 希望見完呢兩份工之後有得返工就好啦!!

五月既私影已經full左, 到六月時仲有d傾緊, 有兩個到未firm, 我都驚又full, 點解夏天我既booking先full既!? 至怕熱及冇錢既我都唔知點算了, 惟有見步行步吧!

周圍走黎走去囉

我爸出院之後, 生活基本上的事如交水電媒, 卡數, 爸公司上既行政全由我一手包辦, 所以我也要周圍走黎走去. 話說今日電話費單及電費就黎到期, 於是今日要去郵局交; 仲有要去我爸公司樓下信箱收信, 最後要去瑪加烈度幫爸預約覆診時間, 聽黎都好多野做咁, 管理一頭家果然唔易, 死得=.="




在天橋上見到呢棵樹, 表面就冇野, 但近睇棵樹好卡哇伊架!! (自己覺得)




點解得意?? 就係因為樹幹上有好多小樹葉, 覺得呢棵樹好有生命力, 加上咁少機會可以咁近距離見到~




終於到左郵政局啦, 行到我上氣唔接下氣, 真係比佢激死!! 快d去交埋d賬單先~




去完公司樓下收信後, 再搵車站搭小巴, 行到好遠先有車呢~而且有d車仲滿座, 惟有再等!




終於到左瑪加烈醫院, 呢個係腎科部門, 就係去呢度幫爸爸預約覆診時間~最後約左7月3日, 估唔到咁耐先可以睇, 有排等囉=.="




預約覆診時間後全個人鬆哂!! 終於做完所有任務! 得閒影下醫院周圍先~


最後當然要影返有[瑪嘉烈醫院]名稱既門面先啦~證明自己黎過!! 真係當係觀光咩=.="