apparel construction 功課開始!!

今日約左兩位同學winnie及燕一齊去中央圖書館做功課, 但對我黎講唔算太遠, 因我姑姐屋企附近有巴士搭去. 真係好耐冇去過, 對上一次係同IVE同學去花卉展, 而家此情不再, 有點傷感


但過去已經過去, 曾經有回憶就可以~呢次去圖書館, 對我黎講唔太習慣, 可以話因為我唔鍾意太寧靜及沉悶, 見門口咁靚靚, 就影下相先~


最靚係個噴水池, 配上個招牌及門口都唔錯既



間圖書館好高, 好宏偉啊


最衰我部電腦又唔可以上網, 唔可以同佢地一齊做功課, 只好返到屋企努力吧!! 對於我呢個對成衣從來冇認識既我, 佢地既說話就好似外星文字一樣, 但也令我開始明白成衣結構, 睇黎仲有排學..


我份功課做D咩!? 其實係分析件衫毎個位置如袋子, button用咩衣車黎車, 遲D會分析埋用咩線步, 係以前家政堂既延續版..


仲有好多專有名詞如撞釘, 雙/單線車, 鈒骨車, 挑腳車等等陸續有來, 真係點記啊??><

去洗牙及食白果!?

今日都係放假, 其實想下個星期先放, 但又要就tracy考試, 只好一次過放哂一日半既補假

首先去左旺角洗牙, 平時我一定唔捨得比成幾百元洗牙, 好在公司有洗牙呢個福利, 到三月就到期, 點都要去洗下, 話哂都成五百幾元(診所內標價), 好在個地方唔太難搵

幫埋間牙醫診所賣廣告先, 先影佢個招牌.


間牙醫診所既門口, 門口細細, 但內裡都幾大


其實不只有洗牙, 係洗牙之前照x光片, 話我有隻智慧齒生斜左, 頂住旁邊隻牙仔, 令到隻牙仔有少少註左, 佢建議我用四百幾元照大x光片, 如要剝牙要成千元!? 哇....剝智慧齒原來咁貴架!? 自己真係大鄉里, 等我考慮下先


之後再到深水埗搵下有冇布買, 目標係做pricinple of fashion design既四塊設計布, 點知店舖都只係開左幾間, 要初十至十二先開, 咪即係下個星期!? 最後只好空手而回...只好之後再黎..



想買飾物及布料店舖都關左門, 快D開門啊><"



即使有店舖開門, 但都冇我心水既配件, 好可惜呢...

同姑姐食晚飯again

今日請左半日假休息一下, 放工後可以周圍去行, 好自由, 好開心!! 夜晚先去間漫畫店, 見到佢以$5至$10賣漫畫, 自己都去睇下, 結果都執到寶^^



毎本都只係五元, 都幾好睇既, 老版娘話完結, 都未完既..



仲有好耐之前都已經想買既paradise kiss, 雖然係比較舊, 但全套只係五十元, 算抵



兩套都係講時裝設計既漫畫, 勁開心呢!! 買完漫畫之後再同姑姐集合, 之後就去哂相做功課及食晚飯, 行左好耐, 最後都係去一間叫做SAIZERLYA既日式餐廳食飯



餐廳布置簡單得黎也坐得幾舒服




我同姑姐都叫左周打蜆湯, 濃味適中, 但蜆比較硬, 不太新鮮



呢個煙三文魚焗海鮮pizza味道唔錯, 尤其係煙三文魚, 超新鮮!!



姑姐叫既鐵板羊鞍, 我好怕羊既穌味, 真係好難頂, 只好食pizza


我同姑姐唔算太大食, 只叫三道菜已經飽飽, 可以返屋企休息, 感覺開心, 如果毎日都唔使加班, 可以咁樣就好, 不過照計呢間公司, 似乎冇咩可能了..

買左情人節禮物比joe豬

呢日可以早少少放工, 於是係海港城附近行下, 期間行到agnes b. 度睇睇朱古力, 而且仲有全粒朱古力試食, 真係好滑, 好好味, 咁好既食物又點可唔留比joejoe呢? 見到個包裝咁靚, 於是買左朱古力, 想同joejoe分享



發覺佢既朱古力都幾貴, 買左百幾元, 而且份量都唔多, 平時我一定唔會買比自己, 但見係joejoe先買比佢, 係佢比較鍾意既牛奶朱古力, 希望佢鍾意~



先比joejoe一個驚喜, 唔好拆個袋住, 就影下相先



個袋袋簡單得黎又幾靚, d朱古力個樣都好好味, 自己都好想食




呢張靚靚既卡到底係咩黎呢??




原來係介紹各款朱古力, 其實我已經試食左兩款, 分別係咖啡及黑朱古力味, 咖啡超正超好味~


聽講joejoe都準備左禮物比我, 唔知係咩黎呢?? 好期待~

同joejoe去城門水塘的相

其實joejoe已經出左相, 只係po左去佢fb內, 我都係無意之中見到, 不過唔緊要啦, d相好靚, 同我平時扮架妹完全唔同, 自己都好鍾意, 果然都係比較鍾意cool多d



呢張個pose都唔錯, 好似沉思中一樣, 都唔知自己究竟諗咩



比較鍾意全個森林feel多過自己, 估唔到市區都有呢個地方



最鍾意呢張既構圖及pose, 連已經add我新fb既同事都話好型



呢張也幾鍾意, 我好like寂靜既冬天氣氛, 加埋個look都好襯



呢張既pose及表情都幾like, 有點高傲自信既感覺, 完全唔似平日既自己



呢張有少少好似找尋道路既感覺, 自己都幾like



呢張相既pose及表情麻麻地, 隻腳好似好怪

呢張相就咁坐係度影相, 都算唔錯ar~


好多謝joejoe抽時間同我影相, 係佢病緊期間都同我汁相, 真係好多謝你, 不但自己好鍾意, 身邊既朋友, 同事都讚我輯相好型, 好靚. 也成為我下次影相既動力, 下次再努力^^

所以話影相唔需要多, 成日影相, 但冇輯係靚都冇用. 反而影得少, 但影得靚既話, 一輯都抵返哂

收到好多利是~

[It's the most easy way to get your money in your life, getting the money by just saying "恭喜發財"], 呢句說話由公司其中一名員工shirley同鬼佬shawn的, 經過natalie既教導, 及shawn訓練左好耐, 今日終於大派用場!! 全憑佢歪歪地既廣東話, 單身既佢也拎左好多利是



當然公司內所有單身男女, 都可以分享到呢份喜悅, 全班跟大隊一齊互相拜年, 部分比利是, 部分收利是, 全間公司都好warm, 收利是既更開心, 咁大個女從未收過咁多利是, 一共有三十幾封呢!! 仲要有四封利是及一封開工利是未逗. 幸福果然不是必然, 要珍惜呢份幸福^^



鳴哇哇~~~攤係枱上全部都係公司既利是, 都咪話唔誇張..


我靜靜地拆左利是封口黎睇, 總共有成七百幾元, 對我黎講已經係大數目, 好開心. 屋企人比果d仲未拆, 唔緊要, 就照慣例, 年十五先拆哂啦, 不過我一定會唔捨得用

fashion project的concept

今日冇出外, 係屋企開始搵principle of fashion design的資料, 呢次既習作係:


1) 先找出四張唔同相, 可以係藝術, 自然, 未來主義及建築
2) 跟據四張相去設計布料
3) 去買材料><"


我只係搵左四張圖, 自己都幾鍾意, 但搵布方面可能會有難度, anyway, 搵左先算. 由於之後會用呢四塊布做套衫, 個系列就叫做reborn, 就係離開賤人先生後, 自己重新既七彩生活, 所以顏色會比較誇張



第一就係呢張, 其實係花既近鏡~



仲有呢張彩色羽毛, 好sharp, 自己也好鍾意



自己也鍾意既一張, 呢張預計既衫底部用黑膠或漆皮, 之後就加其他東西吧!?



呢張其實係植物在水中倒影, 好有生動活潑感覺


希望呢輯reborn可比人生動既感覺, 服裝比較成熟, 暫定以cocktail dress為主既2011/2012春夏服裝, 要視乎買到咩布料

同joejoe去食新年大餐

joejoe病左好多日, 佢終於好返啦, 係我哋兔年既第一次見面, 等我打扮一下先, 先由姑姐幫我恤頭, 之後再由自己化妝, 感覺都唔錯架, 等我影返張相先~



哈哈, 又係度自拍及扮架妹, 就扮一下次啦



去到德福先同joejoe試呢個日式炒麵, 墨魚丸及燒餅, 超好味~



之後去一間叫做牛角既日式燒烤餐廳等位, 雖然係五點幾, 但已經好多人等待晚市, 我未食過呢間, 但咁多人排隊, 應該唔算太差吧!? 係排隊途中, 見到個超可愛既bb對住我笑, 我也努力氹佢開心, 仲叫joejoe偷偷地影左張相~



後來從其他人口中, 得知呢個bb及父母原來係日本人, 佢見你做咩動作, 佢又跟住做, 超可愛~



排左成一個鐘, 終於可以入到餐廳內食飯啦, 餐廳既格局簡單得黎都唔錯~



見到毎張台毎人係咁影, 自己都影下先, 我哋兩個人既爐及餐具~



無聊地影左自己個位子, 擺整齊d影下相先



仲有個餐牌教埋你點燒牛既不同部分, 果然係好pro!!



先黎第一味食物, 就係一口肥牛, 加上牛油, 究竟點煮呢??




仲有呢個芝士什菜, 白痴既我哋先打開鍚紙!? 其實係熟左之後先打開...



仲有呢個絕對好味既牛肩骨, 紋理已經好靚, 脂肪分配平均, 一定要叫呢個!!



由於頭先已經食左野, 所以唔係叫左太多....只係少少慢慢燒




好難先燒到呢個效果, 就係把牛油塗上面, 之後再燒, 焦焦地既芝士都幾靚~




我哋唔知係咪仲未夠飽, 仲要燒埋雞雞袋, 雞雞袋真可憐..




咁我哋當然唔會咁殘忍, 都會比佢食返少少牛肩骨, 好味嗎??



個牛肩骨燒完係呢個樣, 超靚仔, 真係睇得又食得




無論你幾飽都好, 點都要試佢呢個招牌甜品, 就係呢個牛角雪榚


食完飯之後, 同joejoe稍為行下德福, 但布置唔太吸引, 衫也唔太靚, 最後好快就行完, 之後便各自返屋企

全家去拜年!?

其實我哋屋企唔太興周圍去親戚屋企拜年, 多數都係大家出黎飲餐茶, 當作聚一聚及傾下計, 大家互相同對方講祝賀說話, 一齊飲茶, 感覺已經很幸福^^



最後都係決定去食物好味既裕滿人家飲早茶



都未開餐, dede已經好開心, 仲笑到四萬咁口



先黎炒腸粉及雞腳, 本人唔係太like雞腳既, 我唔like"損骨"



呢個煲仔粥好好味, 仲要勁多豬潤, 粥又甜



香軟既千層馬拉榚, 而且仲唔會甜到漏, 食多多件都冇問題~


當然唔少得阿媽至愛既粉果啦, 見佢個皮都好簿


當然唔少得蝦餃啦, 皮簿, 蝦又大隻


仲有呢三個蒸到陷左既流沙奶皇包~



個名叫做"小心奶皇包", 果然係名不虛傳, 奶皇真係會漏出黎, 要好小心食



弟婦叫既豆苗蝦餃, 真係皮又簿, 菜又好味, 蝦又彈牙



仲有好多至愛既食品, 包括牛肉, 腸粉等等, 越叫越多, 張台不時都係呢個食物密麻麻的情況



偷偷地影左張相, dede頑皮, 睇下弟婦點教訓佢, dede先會學乖


飲完茶之後, 就跟父母車去荔角村同婆婆拜年, 好耐冇見過佢啦, 點都要去同婆婆見面先得. 一去到婆婆屋企, 見到婆婆同舅父佢地一定食飯, 我哋都一齊食下飯, 婆婆整既冬菇花膠好味, 可惜舅父佢地係度, 費時影相, 最後只影左婆婆屋企既一盆靚靚菊花



見到鮮色既菊花, 感覺好開心, 如果毎日都咁開心就好^^


拜完年之後, 都係返屋企休息下, 打機, 就黎打機打到痴線啦...好在接到joejoe既電話, 佢已經好返好多, 聽日仲同佢一齊食正野, 勁開心^^