機器紀念日

話說因我爸爸患病, 唔可以再經營間公司, 公司內既機器要當廢鐵賣, 今日係最後一日見到機器, 真係唔捨得, 話哂我同妹及弟都係靠呢幾部機器, 先可以養大成人, 諗起以後都唔可以再見到佢地, 個心都有d唔舒服; 加上父母都工作左咁多年, 比我哋仲唔捨得吧!! 只好影相作留念...

就係呢部商標剪接機, 佢就係今日既主角, 影完佢之後, 就要同佢講再見啦..




<商標機既計算器, 計住切左幾多個o麥啦!! 仲有較燙斗, 切刀溫度

剪接機內各零件既close up~見到父母可以操縱佢地, 好勁啊




媽及姪仔影返張相先~dede望鏡頭已經好難得啦!!



由姪仔示範下點用部機器, 好似童工一樣...首先梗係開左部機器先啦



之後擺卷o麥上旁邊既透明圓盤上




最後拉條o麥頭到切刀上, 再按枱上既制便ok, 之後就要切好指定數量既o麥頭, 再放到盒內




等我都同姪仔影張相先, 呢次冇化妝, 勁樣衰. 姪仔又唔望鏡頭, 激死人><

父母及姪仔既合照~大家都幾開心, 除左dede外




跟住影下其他野啦, 呢個係媽媽一直用既車衣機, 用黎車被袋, 枕頭袋, 甚至部分衣服, 估唔到唔可以再見到佢, 也唔可以用佢黎讀時裝設計吧




仲有呢個迷你小電視, 據說車上仲未有電視時, 就用佢黎黎電視, 雖然畫面只係黑白色的




仲有呢個小刨冰機, 連我都未見過, 因只係整左一兩次...

到公司汁完野之後, 姑姐, 妹妹及我三人去左葵涌廣場, 但唔係買左好多野. 返到屋企之後, 再同父母去深井村食飯, 好鬼熱呢!!

妹妹指定既椒絲腐乳通菜, 通菜夠嫩, 又唔太spicy




我叫既綾魚球, 魚肉都幾彈牙, 但起初咬時好熱



爸叫既炸子雞!? 都幾脆, 而且雞肉又唔太鞋, 都算唔錯




仲有呢個金銀蛋現菜~清清地都好, 但竟然凍凍地, 唔夠熱




呢個魚腸焗蛋個樣靚之外, 仲好好味及好熱, 真係好想食多D, 但已經飽了