葵涌東業工廠大廈 @ 見工 (3) ++ joejoe踏單車

今日又係見工!? 已經連續三日見工, 真係見到有d累...好想休息一下啊!! 今日要九點半到對方公司, 之後再做一個written test及interview, 真係麻鬼煩!!




首先要行呢條長長既樓梯先到, 行到我死下死下咁既款, 之後仲有一條斜路=.="



終於到左工廠大廈啦!! 真係要多謝教我點行既阿差, 佢講d中文同我哋香港人一樣咁正, 好勁啊佢!! 總之影底佢啦><""



到左間公司啦, 呢間係一個大型既安老集團, 有成七十幾間安老院為客人...

之後有份written test做, 係應徵做accounting assistant, 一共有四個問題, 分別係以下各題及答案, 見到條問題真係完全O o西咀, 都唔知點答好=.="

1) 用三個英文生字形容自己
2) 用五十字內既中文描述自己作為該公司的會計助理既期望
3) 作為會計助理後, 見到應收賬目內和實際不相付, 請問你有咩措施及方法改善此問題(用中文答, 字數不限)
4) 請答consolidation (合併, 即子母公司收購合併) 所需的文件 (英文答)

除左第四條唔知自己答案岩唔岩外, 其餘果三條都OK既, 同埋我心內有個諗法, 就係[家陣使唔使咁難啊????) 填完表之後開始面試, 感覺都幾好吧!? 只係突然問我點入數驚左少少...

終於見完工, 可以返我爸公司休息下, 點知...冇人既??? 原來我爸出左去青衣交貨, 媽媽買送仲未返, 我都等左過半個鐘先有門口入呢><

約joejoe既時間遲左一個鐘, 原來joejoe仲未食野, 快d去食野先啦, 餓親你啦!! 最後去左大家樂度食飯~



joejoe食野個樣好可愛啊!!! 見佢食得幾快, 可能全部野食都好味吧!?



joejoe 踏單車啊!! 睇佢個樣幾精神, 而且件衫仲同個袋好襯~~



等我都同單車影埋一份先~其實我係學極都唔識踏單車既!! 只係做下樣影相><



偷拍joejoe踏單車先~佢就好啦, 識踏呢類單車!! 佢起初都唔知我偷拍佢, 後來話比佢知, 佢先至知道, 我果然係頑皮bb...XD




沙田河近一帶既景色呢~~其實都算唔錯架啦, 都見好多攝影師係度影相~




沙田河段近文化博物館既景色, 我覺得要連埋花影先好睇, 因之後已經冇花, 只好離遠影..




終於踏完全條路!! 仲要joejoe載住我, 覺得好開心呢!! 好似以前既電視劇橋段, 男既踏, 女既比載住, 原來感覺咁sweet既^^



見到單車徑上有對情侶踏呢款車, 可以兩個人踏呢!! 於是我同joejoe加錢換左呢款車, 等如兩部單車既價錢, 真係貴呢!!



架單車都幾大下, 一共分左兩邊黎影, 呢邊係前半部分, 由joejoe踏既, 全架車既平衡及方向靠哂joejoe...唔好以為架車係塗鴉, 其實係生瘦=.="



單車既後半部分, 係我踏既果部分, 仲吊住左我既手袋, 可以唔使拎呢, 真係方便^^



呢個紫色響鐘好可愛啊!! 唔知點解有呢種感覺呢? 我見毎架單車都有架!!



我同joejoe可以兩個人一齊踏單車周圍去, 鍾意去邊就去邊, 感覺好開心及好自由!! 之後踏到呢個叫做[博雅山莊]既地方~



山莊既正門...好似好宏偉咁, 其實只有呢道門, 後面咩都冇既=.="



山莊既窗口~都好似幾得意喎, joejoe仲建議我入去影下相...XD



係窗入面影相, 點知影到我好似坐牢咁既樣.....我就係度叫[快d放我出黎]咁既款^^



都係走出去個窗度影返張相先啦!! 好耐冇比joejoe影過啦, 即使用傻瓜DC都影得咁好^^



joejoe同我影影下相去左邊度呢?? 原來去左影山莊外一棵樹既一支洋紫荊. 唔知點解只有佢一支花生左係樹枝上呢?? joejoe影得好靚啊><



踏踏下單車已經由大圍去到沙田, 仲見到呢座捐血站, 都幾靚喎, 完全唔似係座捐血站囉..



再踏遠d就到左去大埔海濱公園既長廊, 但唔可以再踏了, 因為天色開始暗, 而且也差唔多夠鐘還車囉...

係還車途中仲見到有兩對情侶踏我哋呢款車, 而且比我哋新, 我哋踏呢架殘車都可以比佢地快, 我哋兩人真係合拍呢!! 雖然呢架車係殘, 但也滿載住我哋二人一齊踏單車既回憶, 點都要影返張合照既^^



最後叫租單車其中一位職員幫我哋影合照, 點知影得咁差既!? 不過冇計啦...

還左單車後大家去食晚飯, 行左好耐都仲未知去邊度食好, 最後都比我哋搵到間茶餐廳既排餐, 都只係三十幾元, 勁抵啊, 一於入去試下先~



我叫既司華力腸及雞排飯, 仲要跟埋個薯菜!! 都幾好味架, 真係唔錯呢~



joejoe叫既帶子雞排飯連埋薯菜, 佢仲比其中一件帶子我食, 唔使啦, 你食啦~



白痴既我又望住d送菜擺勝利手勢先!! 全部食物都係我既, 哈哈~

食完飯之後大家各自回家, 有d唔捨得, 不過唔緊要啦, 聽日都可以見面!! 大家都係要比心機慳錢, 目的地係城門水塘!!