始終都係加班

一時又加班, 一時又要忙功課, 全部工作都完全分開, 十足十電視連續劇, 都唔知幾時先完...


今晚tracy返工, 未完的工作如開票, 入機, bank rec, schedule等等全部由我做, 自己開始覺得唔公平, 我同佢同樣返學, 但點解佢既時間比我多, 多d時間溫書及做功課, 仲可以拎到A及B; 而我就永遠冇時間, 連成績係點都係未知數, 可能不太理想..


大家去大家樂食飯, 本來想試佢新出既紙上燒, 但邊有咁好心情, 最後食左個燉湯套餐仲好


一個即叩即炒小菜, 西蘭花炒石班魚, 同埋有白飯及燉湯, 都幾好味


個燉湯係足絲雞燉紅棗, 都幾好飲, 仲可以食到雞, 果然係足料炮製~


今晚都係一點走, 臨訓前做好份功課, 要成兩點幾先訓, 點解我咁苦命架?? 如果tracy唔使返學, 幫我做下都好啊..

而且有個壞消息, natalie, ami及anton因為等HR既文件, 等到成夜晚四點幾先走, 簡直係創先河, 不過呢種先河, 就唔係毎個人想創, 大家都覺得無奈..

開始忙功課(下)

琴日完成四塊布, 今日要諗辦法做好本profolio交出去, 講真都幾頭痛, 又唔可以太樣衰, 但又唔可以壓平有立體感既四塊布, 又要襯色...


為左表示成熟女性既特質, 唔想用太七彩繽紛既顏色, 最後選擇比較低調既啡色做底


個位置太約咁編排, 白色紙係文字部分


但問題係邊兩塊布擺面, 兩塊擺底, 加上穿住profolio既絲帶都未決定點整及用咩色, 下星期二就交, 唔知點算..

開始忙功課(上)

首先要同以下各單位人士致歉, 因為我要忙功課, 唔可以陪你地


1) 爸, 媽及妹: 原本想見下你地, 但唔可以返深出見你地, 好耐冇見

2) 姑姐及姪仔: 如果唔係咁忙, 可以同你地去睇戲, 用埋四叔比我哋既戲票. 但同時也多謝姑姐係針子上幫唔少忙^^

3) joejoe: 唔可以同你睇大和號, sorry (其實我勁想睇!!)


放學之後同winnie去大快活食返個下午餐, 食完之後又要返屋企博殺, 好鬼痛苦...


要食飽飽地再工作, 包括碗仔翅, 細碗叉燒飯及油菜, 但呢個時候已經係五點幾, 都幾驚人...


呢個花係我既至like, 但剩下煙既部分仲未整好..


羽毛部分仲未痴好, 原本想用針線繨, 但又趕唔切, 最後只好用白膠漿, 好似做勞作一樣..


最後終於完成四塊布, 比大家睇睇, 滿載住我及姑姐部分心機, 自己都幾鍾意, 除左羽毛果個..

食返餐好既~

month end全個會計部, 多數都會齊人(因為我哋趁月中不太多工作, 都會輪住星期五放假), 加上keith, brenda及jodie齊齊去飲茶


有脆脆既春卷, 仲有附近既喼汁


仲有呢個鼓油皇炒伊麵, yummy~


呢個燒味拚盆味道唔錯, 尤其係海折, 一定要食



個金錢肚都唔錯, 軟軟地唔太硬, 味道也唔太咸


鳳爪顏色過分地紅, 好似過多色素, 唔太敢食


粉果個皮唔算太簿, 都算精瑩通透


仲有呢個炒飯, 賣相麻麻地, 我都係最後一個先食


仲有呢個叉燒穌都唔錯, 皮脆, 叉燒唔太肥, 而且仲熱熱地, 一流!!


紅油炒手一定食!! 可惜個汁唔算太spicy, 皮也唔夠簿



呢個炸生蠔唔係唔好味, 只係覺得太腥



最難食相信係呢碗紅豆沙, 表面平平冇奇, 一食落就...好大陣燶味, 而且又唔甜, 連鍾意食野既我都食唔哂, 仲叫各同事食唔哂唔好勉強..


食完飯之後又要努力工作, 直至一點先放工, 真係可憐, 但好在聽日係星期六都比較好, 但我也要忙功課, 對我黎講未必係好事..

加班..

今晚開始要加班, 又要做到十二點幾先放工, 好想早d休息一下...呢次既month end睇黎要我一個人做哂, 仲有好多票未開, 又有好多voucher未入機

我既功課未完成, 又冇玩pet society探我隻可愛既兔仔, 真係好想死, 快d過左呢日, 早d休息仲好..

出發買布料

今日下午可以放工啦, 仲可以食深水步買布, 途中當然要試下維記既豬潤麵啦, 好耐都冇食過, 超好味, 但要成二十三元碗冇飲品, 值唔值得就見仁見智


香噴噴既豬潤麵, 見到都已經覺得好味, 差點連湯都唔放過


食飽飽之後, 再開始去買布, 足足行左三個鐘, 行到腳都軟埋, 最後都算搵到所需既布料, 但價錢就...對我黎講都幾貴下, 無計啦, 如果我係成市公司做, 個成本冇咁大既



返到屋企, 見到全部材料舖係枱上, 都幾壯觀架, 有些布料個人都幾鍾意, 真係唔捨得剪爛佢, 但為左份功課, 冇辦法囉



攤開哂所有布料及配件, 連我自己都覺得壯覲



好多款彩色羽毛, 仲有彩色既絲帶, 感覺好開心~



仲有藍色, 黃色及綠色既絲巾, 用黎做水就岩哂!



仲有藍色既色丁及銀色既反光布料, 用黎做咩呢?



仲有好多皮料, 珠仔, 各絲巾等等



先就相片舖定所需布料先, 呢個係"sparkled flower"



咁colorful既羽毛及絲帶, 就係做呢個七彩羽毛



呢個水倒影, 就用銀布託底, 之後再用絲巾做水波紋



呢個柔軟既花瓣, 就用柔軟既布去做吧!! 主要以藍色為主


雖然買左材料, 但未有時間做, 睇黎呢個星期六日都要加把勁, 努力工作先得..

準備做功課

連布料都未買, 份功課唔可以完成, 只好趁month end未開始, 就請半日假去買布, 但又費時比其他同事誤會我只顧學業, 而忽略工作, 所以只好同natalie講大話, 同阿爸覆診好了, 唔使比佢問太多, 而且又會批, 睇黎我都幾奸呢, hehehe...

講真果句, 都仲未諗到用咩布料做功課, 只好似街市買送咁, 買到咩就整咩啦, 心內有點擔心, 希望份功課可以完成吧!!

唔得閒影相吧!

天總是喜歡作弄人. 一d都冇錯, 以前私影時買好多靚衫去影相, 周圍問影相有冇興趣合作, 可惜外面靚女太多, 佢地大多數都唔理自己, 一係就話忙, 話自己去搞影會, 開執相班去搵錢



而家讀書, 已經再冇時間影相, 又突然搵返我影相. 平時返工都唔夠時間用啦, 仲要溫書及做功課, 我都想要多D時間啊..



直至最近有兩位影師搵我, 一位係清酒藏既阿kin, 即係之前影sake果位, 佢話暑假搞本寫真集, 要搵五個model. 講真呢d野就唔好預我啦, 我又唔係發明星夢既妹妹仔, 也唔想比咁多人知道我影相, 尤其係我哋IT既男仔一定去書展買寫真集, 比佢地認出, 仲得了既!!??



就係呢張相, 講真佢都影得幾靚既, 影一輯相就冇所謂, 寫真集就唔好啦..



另一位影師係最近打電話比我, 問我有冇興趣影相. 原來佢之前曾經去學影人像, 可能想搵我試下佢既學習成果吧!? 但係星期六, 我都冇時間去影, 只好搵日再同佢去影吧



佢幫我只影一次相, 呢張係佢代表作


令我有少少心郁郁想影, 不過都係讀好書先啦, 時間安排到既話, 間中影一輯都唔錯既~

新買的春裝

真係好耐都冇買衫, 因為公司多野做, 連行街和同朋友食飯既時間都冇, 夜晚又冇時間同屋企人食飯, 真係夠慘, 所以我行街買左兩件衫, 但我又唔想成日扮架妹, 扮可愛, 想買比較成熟少少, 但實在太多碎花衫賣, 自己到最後都買左一件...



見到呢條裙實在太可愛啦, 而且出面比較少有, 但就要成百幾元, 自己覺得好貴啊..



之後去左zara睇衫, 買左件八十幾元, 雖然樣子比較普通, 但又可以襯斯文返工衫又得, causal 又得, 而且仲可以試衫



講開zara, joejoe送比我既五百元coupon都仲未用, 唔知買咩衫好呢? 不過唔緊要啦, 慢慢選擇吧!

婆婆生日快樂^^

先祝婆婆生日先, 由於婆婆住麗閣村, 毎年婆婆生日, 我哋一定會去西九龍中心, 食婆婆至愛既pizza hut



我開始搵做功課既布料, 但因為店舖太早收, 而且又落住毛毛雨, 買得唔太多物料做功課, 開始擔心唔知點算, 最後只好下星期三請半日假去買物料做功課, 終於扣左一日年假..



去到見到妹及婆婆, 仲有舅父及舅母佢地, 但同佢地唔太熟, 幾乎冇任何交流, 只有一直同妹傾計, 同時也恭喜佢終於搵到份工



首先要影下婆婆先, 見到佢好健康, 又笑得咁開心, 自己都覺得開心^^



呢個凱撒沙律, 我既興趣不太大, 但個look都幾靚仔既~




呢個新出既花花pizza, 我都唔記得左叫咩名, 賣相算唔錯, 但味道一般




呢個至尊都唔錯, 但如果係芝心邊會更好食><




白汁海鮮焗飯賣相普通, 最後我都冇食..




呢個脆餅賣相算唔錯, 但太受歡迎, 我都未食過><"



呢個係我叫既千島海鮮pizza, 連唔食千島沙律醬既我都覺得好味


一共十人食左三個pizza, 唔知算唔算誇張呢? 不過至緊要好味就得啦!! 見到大家食得開心, 尤其係婆婆, 見到佢開心就好~


食埋個甜品雪榚之後, 見到dede食得咁可愛, 自己都影相先~



味道算唔錯既紅豆雪榚, 連唔食紅豆既我也覺好味




睇佢食雪榚都食得幾滋味, 但唔知望左邊度, 唔專心




睇佢仲食到開心擺v字手勢, 杯雪榚真係咁好味!?

和同事食lunch

毎次星期五食飯, 總會唔齊人, 呢次也係, 今日tracy放假. 我哋五個人包括natalie, ami, sunny, anton及我去左以健康食品為主既果一道食飯, 我就諗都唔使諗, 都食蕃茄龍利柳烏冬



毎次一定叫既熱柚子茶, 唔太甜, 又有香甜柚子味, 正!



見到個樣都好味, 我至愛既三種食物, 包括蕃茄, 烏冬及龍利柳^^



呢個係anton食既紅米飯, 點解我會影? 因我從來唔食紅米飯, 但見個樣幾靚, 於是決定影底佢

另一款卡game

今日lunch都係玩卡game, 唔係mamma mia, 而係另一隻遊戲叫掘金, 係隻幾考心計(!)既遊戲, 自己會扮好人或壞人既角色, 遊戲途中唔可以比人知自己係好定壞人, 直到遊戲最後先會真相大白, 幾好玩既~



終極獎品就係呢堆金, 儲得越多就win




仲有各款路牌, 好人就互相幫忙, 去建條路取金吧!




仲有各種封路牌, 去封住壞人! 不過有時都會比好人封返自己




成日話好人或壞人, 就係抽取呢d牌決定, 上面有字既係壞人




就係咁樣建築全條路, 有時壞人會擺掘頭路阻住人行




經過三舖後, 終於有結果, 最多係natalie, 最少就...當然係我啦, 一舊金都冇=3="